आनंदाने नांदत होते हिन्दू मुसलमान

शिवरायांच्या छायेखाली कधीच नव्हती वाण
आनंदाने नांदत होते हिंदू मुसलमान..

काळ्याराती तळपत होतं जिच्या रूपाचं ऊन,
अशी देखणी होती एका मुसलमानाची सून,
त्या तरूणीला आई म्हणाला राजा तो शीलवान,
आनंदाने नांदत होते..

आरमार प्रमुख केला दर्यासारंग दौलतखान
संत हो याकूतबाबा त्यांना जमीन केली दान
शिवबासाठी हिलालची झाली पाच पोरं कुर्बान
आनंदाने नांदत होते..

स्वराज्यावरी चालून आला ठार केला हो खान
मृत्यूनंतर वैर संपलं केली कबर निर्माण
दिवाबत्ती लावा कबरीला दिलं हो फरमान
आनंदाने नांदत होते..

~ महाकवी वामनदादा कर्डक