शिकणाऱ्या भावा रं

शिकणाऱ्या भावा रं, लिवनाऱ्या भावा रं
वाचणाऱ्या भावा रं, रडणाऱ्या भावा रं
शेताच्या बांधावरनं, मी हाक तुला देतोय
जंगलाच्या गर्भामधनं, मी हाक तुला देतोय
मी शेतमजूर बोलतोय, मी आदिवासी बोलतोय
यंत्राच्या चक्रामधनं, मी कामगार बोलतोय
तुझी माझी एकी घडू दे, शेत माझं हसतं फुलू दे
जंगलामधली पाखरं उडू दे, अन्यायाचं मूळ तुट़़ू दे, हा!
सूर्याची वाट बघतोय, क्रांतीच सपानं बघतोय
कॉलेजची बिल्डिंग तुझ्या, लयी मोठी हाय म्हनत्यात
तू वाचतो ती रं बुकं, लयी मोठी हाय म्हनत्यात
तू बसतो ती रं बाकं, लय भारी हाय म्हनत्यात
अरं बिल्डिंगीच्या थोडीमध्ये, पुस्तकांच्या घडीमध्ये,
बाकांच्या फटीमध्ये, हा!
लयी पिढया त्यात गेल्या, नायी पुस्तकात लिवल्या
तू कशासाठी शिकतोय, नोकरीसाठी शिकतोय
तू कशासाठी शिकतोय, भल्या जीवनासाठी शिकतोय
तू कशासाठी शिकतोय, माणूस बनण्यासाठी शिकतोय
नोकरी नाही, सुख नाही, चैन नाही, माणूस नाही, हा!
एवढी मोठी डिग्री रं, ती काय कामाची रं
लय सुखी देश आहे, तुझ्या पुस्तकात लिवलयं
स्वतंत्र देश आहे, तुझ्या पुस्तकात लिवलयं
स्वयंपूर्ण देश आहे, तुझ्या पुस्तकात लिवलयंग्न
सम्राटांच्या पंजामध्ये, धर्मांधांच्या जबडयामध्ये,
शहराच्या बाजारामध्ये, हा!
तू गहाण पडला रं, नाही पुस्तकात लिवला रं
संप, मोर्चा बघू नको, हे शिक्षण तुला सांगतय
गरिबीकडं बघू नको, हे शिक्षण तुला सांगतय
झोपडयाकडं बघू नको, हे शिक्षण तुला सांगतय
ते घाण लई असतंय, हे शिक्षण तुला सांगतय
अरे संप नको, मोर्चा नको, गरीब नको, गुरीब नको
झोपडया नको, घाण नको, हा!
तुला भेकड बनवतय, शिक्षण लाचार बनवतय
मी जंगलामध्ये लढतोय, तुला बातमी नसलं कळली
मी शेत मागाया उठलोय, तुझी नजर नसलं वळली
मी फॅक्टरी मागाया उठलोय, आता मूठ माझी वळली
सोडं पेन, उचल घण, घडव मन, माजलं रण, हा!
लय वाट तुझी बघतोय, मी वाट तुझी बघतोय
सूर्याची वाट बघतोय, क्रांतीच सपानं बघतोय