भल्लरी म्हणा रं

भल्लरी म्हणा रं, धरा सुरात ठेका
शिवार राखाया, अशी गोफण फेका
घढीत कोल्हा कुई कुई करतोय
नजर चुकवून पिकात शिरतोय
दगाड उचला, जागीच कुचला, नेम धरून ठोका...
कष्टाची खात्री पटली तशी जमीन काळी नटली
जशी शेताला उभारी फुटली मान उचलून जवारी उठली
बाजुच्या गावात आवई उठली
टोळधाड लय मोकाट सुटली
काठया बनाटचा घ्या मोठया मोठया, चोर चिलट रोखा...
लय बेतं महाग झालं, किती पैसं त्यातच गेलं
पर कष्ट फळाला आलं, पावसानं उपकार केलं
भुईमुग हुलगा मटकी तुरी
सुकवून उचलून न्यायच्या घरी
गुरगुर फुटफुर करीत टपून बसलाय रान बोका...
कणसाची मळणी करू, दानं उपवून पोत्यात भरू
कुनी जूपा रं गाडी बैल, लांब जायाचं पंधरा मैल
दलाल भडवा येईल आडवा
आपला शिमगा त्याचाच पाडवा
एकीनं त्याच्या कारस्थानाचं काळं पानी जोखा...
आता सुगीचं दिवस सरलं, उजवायचंय पोरगं थोरलं
त्यात माझं बी धोतर इरलं, बायकुचं गहाण डोरलं
सावकार करतोय भामटेगिरी
संघटना पाळा, त्याला पिटाळा, सोडू नका मोका...
विलास घोगरे