भीमवंदना

भीमराया घे तुझ्या या लेकरांची वंदना
आज घे ओथंबलेल्या अंतरांची वंदना
दुमदुमे ' जयभीम ' ची
गर्जना चोहीकडे
सारखा जावे तिथे
हा तुझा डंका झडे
घे आता घे राहिलेल्या संगरांची वंदना, आज घे...
कोणते आकाश हे
तू आम्हा नेले कुठे
तू दिलेले पंख हे
पिंजरे गेले कुठे
या भराऱ्या आमुच्या, ही पाखरांची वंदना, आज घे...
कालचे सारे मुके
आज बोलू लागले
अन् तुझ्या सत्यासवे
शब्द तोलू लागले
हे वसंता, घे मनांच्या मोहरांची वंदना, आज घे...
एक आम्ही जाणतो
आमची तू माऊली
एवढे आहे खरे
आमुची तू सावली
घे आम्ही त्यांना दिलेल्या उत्तरांची वंदना, आज घे...
जाळले गेलो तरी
सोडले नाही तुला
कापले गेलो तरी
तोडले नाही तुला
ही तुला उध्वस्त झालेल्या घरांची वंदना, आज घे...
तू उभा सूर्यापरी
राहिली कोठे निशा
एवढे आम्हा कळे
ही तुझी आहे दिशा
मायबापा घे, उद्याच्या अंकुरांची वंदना, आज घे...
धम्मचक्राची तुझ्या
वाढवू आम्ही गती
हा तुझा झेंडा आम्ही
घेतलेला सोबती
ऐक येणाऱ्या युगांच्या आदरांची वंदना, आज घे...

• सुरेश भट