पुढारी बघा निघाला दिल्लीला

पुढारी बघा निघाला दिल्लीला
इसरून जाणार झोपड गल्लीला
पुढारी बघा निघाला दिल्लीला
खादीचा झब्बा घालून पुढारी, हात जोड़ुनी हो मत मागतो
निवडून येतो, साहेब होतो, मतदाराचा गळा घोटतो
झोपडपट्टीच्या दादा लोकांना, या पुढाऱ्यानं दारू पाजली
थप्पी मोजली, गुंड पोसली, दमदाटी देऊन मत मिळविली
तोडाया मोडाया झोपडपट्टीला, मंत्री होऊन कायदा काढतो
हुकूम सोडतो, पोलिस धाडतो, ज्यांनी निवडून दिलं त्याला
निवडणुकीमध्ये पैसं खर्चाया, शेट सावकारांचं कर्ज काढतो
महागाई वाढवून, फेडून टाकतो, काळ्या धंद्यांचं परवानं देतो
राशनच्या दुकानाम्होरं लायनीला, पुढारी कधी का उभा राहतो
किडकं धान्य, तुम्हा आम्हा चारतो, स्वत: मात्र दिल्लीराईस चाखतो
पाच वर्षांनी पुन्हा येणार, हात जोडुनी मतं मागणार
चमचे लोकांना, हाती घेणार, तुम्हा आम्हाला तोंडी लावणार
ताई, माई, दादा, इचार करावा, असलं मतदान बाजूला सारा
बहिष्कार पुकारा, द्या क्रांतीचा नारा, एक होउनी लढण्यास उभा रहा

• विलास घोगरे