वस्तीवस्तीच्या बायाबायांमध्ये

वस्तीवस्तीच्या बायाबायांमध्ये एकीची गरज हाय ग
मानसावानी जर जगायचं तर आज एकीची गरज हाय ग
आजवर भीत भीत जगलो आपुन
घरांच्या भिंतींना दुनिया मानून
इचार करून आता भायेर पडून
अन्यायाला दूर कराया जागं व्हायाची गरज हाय गं, मानसावानी...
कोणी म्हणेल बाईमाणूस तुम्ही
तुमच्या हातून काही होणार नाही
तुम्ही गुमान घरी बसत का न्हाई
गुमान ऱ्हाऊन आता भागायचं न्हाय हे बजावून सांगायचं हाय गं, मानसावानी...
कारखान्यात, शेतात, रस्त्यावरी
बायामुलींना त्रास भारी
जिथं तिथं होते गुंडगिरी
बायांची ताकद सारी एक झाली तर कुणाची टाप मग हाय गं, मानसावानी...
सारख्या कामाला नाही सारखा पगार
महागाईनं लई केलंय बेजार
न्हाय बाळंतरजा न्हाय पाळणाघर
एकीच्या जोरावर सारे हक्क आता मिळवून घ्यायाचे हाय गं, मानसावानी...
शहरातल्या बाया आता एक होऊ
दूरवर नजर मग टाकून पाहू
बहिणींना शेतावरल्या हाक देऊ
शहरातल्या खेडयातल्या बाया झाल्या एक तर कुणाची भीती मग हाय गं, मानसावानी...
एकजूट झाल्यावर धीट होऊ
पुरुषांच्या लढयाला साथ देऊ
लढा पुढे आणि घेऊन जाऊ
समदी ताकद आपली लाऊनशानी एकेक लढाई जिंकायची हाय गं, मानसावानी...

• कल्पना जवळीकर