स्त्री मुक्तीची ही ललकारी

स्त्री मुक्तीची ही ललकारी भिडते गगनाला
सनातन्यांनो पिळणाऱ्यांनो जाणा समयाला, स्त्री मुक्तीची...
पिता, पती अन् पुत्र लादती, इच्छा आपुली नारीवरती
समानतेचे हक्क मागता हसती तिच्या धैयाला, स्त्री मुक्तीची...
पंतप्रधान असो देशाची, अधिकारी अन् कुणी राज्याची
नारी तरीही अबला म्हणती, बांधती संसाराला, स्त्री मुक्तीची...
कारकून वा शेतमजूर ती, तज्ञ, सूज्ञ, शास्त्रज्ञ असो ती
घरामध्ये अन् कामावरती झटते जगण्याला, स्त्री मुक्तीची...
चला भगिनींनो जूट उभारु, समानतेची ध्वजा फडकवू
श्रमणाऱ्यांचा कोट बांधुनी मिळवू मुक्ती या, स्त्री मुक्तीची...

• माधव चव्हाण