ताकद आपुली बळकट करुनी

अहो ताकद आपुली बळकट करुनी
श्रमिकांसंगे जाऊ चला
मंत्र एक हा ध्यानी ठेवा, तोच मुक्तीचा मार्ग खरा, जीऽऽ जीऽऽ
अहो पायामधल्या बेडया होती, रूढी आणि परंपरा
जाती-धर्म करी बुध्दिभेद हो, मनुजाचा या पृथ्वीतला, जीऽऽ जीऽऽ
निसर्गे दिधला जन्म मानवा, नाही कल्पिला भेदाभेद
मनुष्य निर्मित भेदभाव करू, नष्ट घेऊनी अचूक वेध, जीऽऽ जीऽऽ
स्त्री-पुरुषांच्या समानतेचे, स्वप्न खरे करूया जगती
समाजसत्तावादासाठी टाकू पाऊल हे पुढती, जीऽऽ जीऽऽ
कष्टकऱ्यांच्या विविध चळवळी, एकजुटीमध्ये आणू चला
मानवमुक्तीसाठी लढण्या, एकजूट हा मार्ग खरा, जीऽऽ जीऽऽ
पददलितांची पिळवणुकीतून, मुक्ती व्हावी हा एकच ध्यास
मनी घेऊन जाऊ आपण, निर्मू आपुला नवा समाज, जीऽऽ जीऽऽ

• शारदा साठे, ज्योति म्हापसेकर