या वस्तीच्या पलीकडे

या वस्तीच्या पलीकडे, जरा दूर
काळ्या नाल्यापलीकडे
कचऱ्या भुताच्या रानापाठच्या
शिंग्या डोंगराच्या पलीकडे, जरा दूर
असेल माझे गाव
वसले असेल माझे गाव
या वस्तीला विळखा धुरकटसा
झाडांचा चेहरा धुळकटसा
चिखलाचा राडा किचकटसा,
हो, खेळ माझा मांडला मी रस्त्यावरी
हात चिखलात शोधती काहीतरी
असले नसेल गाव माझे, असले नसेल गाव माझे
इथे यंत्रचाकांची वाढे गती
तशा उंच वाढती इमारती
मग खचतो पाया दहा विती
रोज सागराचा भंगी घाण काढतो
या शहराच्या उजव्या अंगाला
असले नसेल गाव माझे, असले नसेल गाव माझे
इथे माणसाच्या पाठीला आलंय पोक
पण आगीनगाडयांचा दरारा चोख
वर मोटारगाडयांचा दिमाख झोक
इथे जिवात जीव नाही, अंगात रग नाही
अशांच्या गर्दीचा हा मसणवटा
असले नसेल गाव माझे, असले नसेल गाव माझे
इथे वाहतोहे पैसा पाण्यात
अन् पाण्याला भाव जसा दुष्काळात
इथे हवेला भाव चढा दुकानात
श्वास राहतो खाली, आणि वर वरचा
आणि बेरंग जाहतो जीवनाचा
असले नसेल गाव माझे, असले नसेल गाव माझे
माझे स्वप्नातले हो गाव हिरवे
त्याचा हिरवासा श्वास अन् रूप नवे
उन सोनेरी तिथले हवे हवे
तिथे नभनिळी दुलई पांघरायला
आणि माणसाचा रंग हो माणसाला
असले असेल गाव माझे, असले असेल गाव माझे