जंगले तोडली पाऊस गेला

जंगले तोडली पाऊस गेला, वसाड झाली धरती
करा राज्य रे दगडावरती, करा राज्य रे वाळूवरती
कुठे ऊस होतो बेसुमार, कुठे पाण्याची मारामार
औषध खतांची तऱ्हा न्यारी, बी-बियाणांची चिंता भारी
आमचं व्हतं ते नव्हतं केलं, याचंच खरं म्हणा वरती, करा राज्य रे...
विकास आला घरोघरी, कारखान्यांची बघा गर्दी भारी
शुध्द हवेचा पत्ता नाही, अन् बिन विषाचं पाणी नाही
रांग लावूनी दवाखान्याला, जन्माची झाली माती, करा राज्य रे...
कुठे कशाची टाकी फुटली, त्यात पंचवीस पन्नास मेली
कुठे कशाची नळी फुटली, त्यात धा पाच हजार मेली
शास्त्र वापरून डोकं चालवून, विषच काहो काढती, करा राज्य रे...
अणुयुगाची सुरुवात झाली, कॉम्प्युटरांनी गर्दी केली
बेकारांच्यात भरती झाली, तारका युध्दाची भीती वाढली
घाण टाकुनी कचरा टाकुनी, जगाची कचरा पेटी, करा राज्य रे...
ते सारे सत्तेवर जाणार, आम्हीच हे सारं भोगणार
आता गप्प नाही बसणारं, ते सारं ताब्यात घेणार
जंगलं आमची जमीन आमची, आम्हीच ती राखणार
आम्हीच जंगलं राखणार, आम्हीच देश राखणार
आम्हीच जग राखणार, आम्हीच माणूस राखणार, करा राज्य रे...
धनाजी गुरव