पाऊस आला विज्ञान होऊन

पाऊस आला विज्ञान होऊन
विज्ञान आले माणूस होऊन
आमच्या अडाणी कल्पना
वीज पडून खाक झाल्या
वादळ झाले खूप मोठे
छत्र्या आमच्या उडून गेल्या
भिजू आम्ही चिंब सारे
ज्ञानाच्या या पावसात
निळे रस्ते हिरव्या जमिनी
आकाशी हो प्रकाश पिवळा
नाही प्रदूषण नाही कुपोषण
पळून गेले रोग सगळे
अण्वस्त्रे ती विझून गेली
थिजून गेले त्यांचे मालक
युध्दाचे हो पाणी झाले
शक्ती झाली आमची इच्छा
आम्ही कोण काय पुसता
आम्हीच पाऊस आम्हीच ज्ञान
आम्हीच तुम्ही विज्ञानाचे
मालक आहोत खरेखुरे
वसली गावे आता आपली
आता उठून जायचे नाही
अकाल नाही दुष्काळ नाही
धूप नाही, धूर नाही
पाऊस आला खूप मोठा
पैसा त्यांचा झाला खोटा
मडके आमचे काठोकाठ
भरून आले, आला पूर
साठवू किती, ठेवू कुठे - मोहन देशपांडे