ज्ञानसूर्याला ग्रहण लागलं

अहो, ज्ञानसूर्याला ग्रहण लागलं, अंधारलं जग सारं होऽऽ
तू जागा हो माणसा, जागा हो आणि उघड आपुलं डोळं रं, जी जी रं जी
ग्रहण लागलंय ग्रहण, ग्रहण लागलंय ग्रहण
अज्ञानाच्या समुद्रामध्दी बुडते जनता सारी हो
अन् विज्ञानाची नाव इवलीशी कुणाकुणाला तारी रं, जी जी रं जी, ग्रहण...
परग्रहावर पाऊल टाकून माणूस पोचे चंद्रावरी
अन्नावाचुनी वस्त्रावाचुनी मरते जनता सारी हो, जी जी रं जी, ग्रहण...
आंधळ्या विश्वासांच्या बेडया अडविति पाऊल लोकांचे
त्याच युगामधी पाऊल पडते चंद्रावर विज्ञानाचे, जी जी रं जी, ग्रहण...
विज्ञानाच्या नावेमध्ये कोण आज हे बसले हो
गरज आम्हाला कशाची आणि हेतू त्यांचे कुठले हो, जी जी रं जी, ग्रहण...
किती किती आम्ही वाट पहावी, ग्रहण हे सुटण्याची हो
विज्ञानाच्या नावेमधले, सुकाणू घेऊ हातामधी, जी जी रं जी, ग्रहण...
विज्ञानाची चळवळ बनवू, अंधार हटण्यासाठी हो
तिसरा डोळा ज्ञानाचा तो, उघडू उद्याच्यासाठी हो, जी जी रं जी, ग्रहण...
विज्ञानाला राबवू या मग, लोकहिताच्यासाठी हो
विज्ञानाचे कामच बनवू, मानवमुक्तीसाठी हो, जी जी रं जी, ग्रहण...
विज्ञानाचा प्रकाश फिरू दे, घराघरामधी लोकांच्या
आणि पेटवा मशाली तुम्ही, आता जन जागराच्या
अन् मगं?... सुटंल ग्रहण सुटंल, सुटंल ग्रहण सुटंल