दुनियेची दौलत सारी
duniyechi daulata sari duniyechi daulata sari duniyechI daulata sArI | दुनियेची दौलत सारी
दुनियेची दौलत सारी, गडया दुनियेची दौलत सारी
बघ पिकलीया माझ्या शिवारी
रातदिवस राबून कसली
आली भरात अन् मुसमुसली
आज आनंदानं बघ हसली
वर आकाश उधळीत लाली
खाली-सोनेरी ही शेतसरी, दुनियेची...
कणसं मक्याची हुरडयाला आली
बसली हळद लाजून खाली
तूर शेंगानं आपुल्या न्हाली
गहू खपलीचा लहरा मारी
भुईमूग रोवून बसला आरी, दुनियेची...
आला रंगात राळा माझा
फुलं उधळितो कारळा तुझा
साऱ्या धान्याचा शाळू राजा
ऊस वाऱ्यावर डोलतोय भारी
सर्जा-दख्खनला दे ललकारी, दुनियेची...
या रे हातात गोफण घेऊ
रान राखाया एकीनं जाऊ
ऐतखाऊंना हाकलून देऊ
जिवापरीस आमुची प्यारी
धरणी कसेल त्याची सारी, दुनियेची...
- शा. अण्णाभाऊ साठे
