सुटलाय धोटा साच्यावरून

सुटलाय धोटा साच्यावरून, साचा बंद, साचा बंद करून
धोटं समदं घेऊन, रस्त्यात आला लढा लढायला
त्या अडवायला छाती असल तर या...
काँग्रेस सरकार धन्याची जात, ऐटीत घालून हातात हात
मधून येती कराया घात, सत्तेची बंदूक नेहमीची बात
म्हनं देऊनी भाकरी, पडलं ती चाकरी, नाहीतर ठोकरी
माराया येताय का या...
त्वेषानं चिडून आलो रणात, निसतीच भाकरी नाही मनात
कारभार समदा घ्यावा हातात, धनिकशाहीचं पाडून दात
तूर्ताला ठरलं, हत्यार धरलं, रणी उतरलं
अडवाया येणार या...
धोटा, बॉबिन, बांबू, रहाट, खांद्याला खांदा हातात हात
मैदानी आलो एका दमात, माघार नाही एकच बात
बाना झोडायला, एकी तोडायला, गोळ्या झाडायला
छाती असलं तर या...
बि.आय.आर. कायद्याचा वापर करून
मालक बोका बसलाय माजून
संघाचा चमचा हातात घेऊन
कामगार वर्गाच रक्त पिऊन
याचा बदला घेणार, संघ ठेचून काढणार, बि.आय.आर.
कायदा तोडणार अडवाया येणार या...

• शाहीर अमरशेख